Vikufréttir Varmárskóla 22.mars

Við erum enn að vinna með niðurstöður nemendaþingsins frá síðustu viku. Þær segja mikið um líðan barnanna okkar í tengslum við samskipti í netheimum. Þá höfum við líka verið að ræða tölvunotkun með nemendum í öðrum árgöngum. Þetta er eins í heimi barna og fullorðinna, tölvunotkun dregur úr öðrum samskiptum og eins og við vitum öll eru samskipti í netheimum oft alls ekki uppbyggileg. Þá hefur einnig komið fram í samtali við krakkana að margir upplifa að það sé aldrei hægt að fá neinn til að leika þar sem allir eru uppteknir í tölvunni. Þetta er mjög mikilvægt atriði því leikur er eðlilegasta leiðin fyrir börn til að öðlast þroska og efla félagsfærni. Í leikjum læra börn að taka tillit til annarra, skiptast á og hlusta á ólíkar skoðanir, þau læra líka að búa til reglur sem allir samþykkja og svo ótal margt fleira. Þá felur frjáls leikur einnig í sér óteljandi tækifæri til sköpunar svo leikur er alls ekki bara eitthvað til að drepa tímann með. Margir tölvuleikir eru auðvitað uppbyggilegir og þroskandi en því miður eru þeir fleiri og virðast vera meira spennandi sem eru það alls ekki. Við verðum að biðla til foreldra um að virða aldursmörk bæði á samfélagsmiðlum og í tölvuleikjum. Þannig vinna þeir börnunum sínum mest gagn. Það er svo auðvelt að leyfa krökkum bara að fara í tölvuna að leika í einhverju, en þá verðum við að hafa í huga að það sem er auðveldast að gera er ekki endilega það sem er best fyrir mann, því hvernig á maður að eflast að þroska ef maður fær ekki að takast á við það sem er manni hæfilega erfitt?  Með þessari frétt fylgja myndir af niðurstöðum nemendaþingsins þar sem fram kemur hvaða nemendur telja helstu kosti og galla við samfélagsmiðla og tölvuleiki. Við hvetjum foreldra til að ræða þetta með börnunum sínum og setja þeim reglur um hvernig þau umgangast þessa miðla.

Við fengum niðurstöður úr Foreldrakönnun Skólapúlsins og þökkum ykkur kærlega fyrir þátttökuna. Við getum vel við unað en auðvitað er alltaf eitthvað sem má bæta. Mat foreldra er að í flestum þáttum séu þeir sáttir við starfið í skólanum. Niðurstöðum verða gerð nákvæm skil í matsskýrslu skólans sem verður birt við lok skólaársins.

Vikurnar fyrir páskafrí vorum við með lestrarátak. Þjálfun í lestri byggir á æfingum rétt eins og í öllu öðru sem maður vill verða góður í. Þessi duglegri sem maður er að æfa sig þess auðveldara verður verkið. Bekkir og árgangar söfnuðu niðurstöðum saman og allir fengu smá viðurkenningu fyrir dugnaðinn í dag og gæddu sér á kanelsnúðum í kaffitímanum.

Hafið það gott í páskafríinu og skóli hefst aftur þriðjudaginn 2.apríl

Starfsfólkið í Varmárskóla