logo
  • Virðing -
  • Jákvæðni -
  • Framsækni -
  • Umhyggja

Skólinn

Varmárskóli er  er staðsettur í ómetanlegu umhverfi þar sem leirurnar, Varmáin, fellin og móarnir fléttast við íþróttaparadís Varmársvæðisins. Skólinn er fyrir nemendur í 1. til 10. bekk. Nemendur eru rúmlega 840 í 40 bekkjardeildum auk 5 bekkjadeilda í útibúi Brúarlands.

Varmárskóla er skipt upp í tvær deildir, yngri og eldri deild. Annarsvegar yngri deild sem hýsir 1. – 6. bekk og eldri deild með 7. – 10. bekk. Deildirnar eru í sitthvoru húsinu og þannig gefst tækifæri til að skapa menningu og andrúmsloft sem hæfir ólíku aldursstigi.

Í yngri deild kenna umsjónarkennarar flesta tíma hjá sínum bekk og halda utan um námsskipulag og eru í samskiptum við foreldra. Í eldri deild er lögð áhersla á faggreinakennslu, verk-og valgreinar.

Varmárskóli hefur mótað sér stefnu með áherslu á útikennslu, heilsueflingu og sjálfbæra þróun. Skólinn

Skrifstofa skólans er opin frá kl. 8.00-16.00 alla virka daga.

Netfang skólans er:    varmarskoli@varmarskoli.is

 

Umsókn um skólavist

Skráning í Varmárskóla fer fram í gegnum íbúagátt Mosfellsbæjar. Gott er að hafa samband við skólann og heyra í stjórnendum. Þetta á einkum við ef nemandi kemur úr öðrum skóla ýmist að hausti eða á miðjum vetri. 

Sótt er um mötuneyti og frístundasel gegnum íbúagáttina. Ef einhverjar breytingar verða á mötuneyti eða frístundaseli (uppsögn á þjónustu/ breytingar) þarf að gera þær fyrir 20. hvers mánaðar.

Ef nemandi hættir í Varmárskóla þarf foreldri að segja upp mötuneyti og frístund hafi nemandi verið skráður þar.


Umsókn um leyfi

Umsjónarkennarar geta veitt nemendum sínum leyfi í allt að tvo daga. Ef sækja á um leyfi frá skólavist í styttri (3-5 daga) eða lengri tíma (vika eða lengur) þarf að sækja um það á viðeigandi eyðublöðum. Hafi foreldri/forráðamaður ekki heyrt frá skólanum um leyfisveitinguna er svo litið á að leyfið hafi verið samþykkt.


Í 15. grein laga um grunnskóla frá 2008 segir:

„Sæki foreldrar skólaskylds barns um tímabundna undanþágu þess frá skólasókn í einstökum námsgreinum eða að öllu leyti er skólastjóra heimilt að veita slíka undanþágu telji hann til þess gildar ástæður. Foreldrar skulu þá sjá til þess að nemandinn vinni upp  það sem hann kann að missa úr námi meðan á undanþágu stendur”.

Skráning í mötuneyti fer fram á Íbúagátt

Metnaðarfullt skólamötuneyti í Mosfellsbæ

Mötuneyti Varmárskóla starfar samkvæmt samræmdri stefnu skólamötuneyta í leik-og grunnskólum Mosfellsbæjar í samræmi við ráðleggingar Lýðheilsustöðvar. Í Mosfellsbæ er lögð áhersla á að í skólamötuneytum bæjarins njóti skólabörn fjölbreyttrar fæðu í hæfilegu magni, að matvælin séu rík af næringarefnum, fersk og að þau séu í háum gæðaflokki. Lögð er áhersla á að farið sé eftir ráðleggingum Lýðheilsustöðvar hvað varðar fæðuval, næringargildi og skammtastærðir.

HÁDEGISMATUR

Nemendum stendur til boða hádegisverður sem saman stendur af kjöt- eða fiskréttum, súpum, mjólkurvörum, brauði, grænmetir og ávöxtum. Matseðillinn er unninn samkvæmt manneldismarkmiðum fyrir Íslendinga og er lögð áhersla á að hafa máltíðir fjölbreyttar. Einnig er hægt að kaupa samlokur, jógúrt og drykki í lausasölu í eldri deildinni.

ÁVAXTASTUND

Hægt er að sækja um ávaxtabita fyrir börn í 1. - 6. bekk í Varmárskóla í gegnum íbúagátt Mosfellsbæjar. Ávaxtabitinn inniheldur ferska ávexti daglega. Forráðamenn barna geta sótt um ávaxtabitann í gegnum Íbúagáttina.

NESTI AÐ HEIMAN

Þau börn úr grunnskólanum sem ekki kaupa hádegismat í skólanum geta komið með nesti að heiman og borðað það í mötuneyti með öðrum nemendum. Þar er aðstaða til að grilla samlokur og hita mat í örbylgjuofni. Áhersla skal lögð á að nestið sé hollt og næringarríkt.

Mötuneyti

Sögulegt yfirlit Varmárskóla
Kennsla hófst í Varmárskóla árið 1961. Þá var Lárus Halldórsson skólastjóri en hann var skólastjóri í Brúarlandsskóla frá 1922.
Fyrsti áfangi Varmárskóla yngri deildar var fullbyggður 1964, áður var kennt í Brúarlandsskóla frá 1922. Þegar rýmkaðist um nemendur í Brúarlandsskóla 1961 var unglingunum kennt þar.

Um 1970 var hafist handa við að byggja Gagnfræðaskóla Mosfellsbæjar, núna eldri deildina. Hófst kennsla þar 1973.
Þegar mikið óveður gekk yfir landið í febrúar 1982 brotnuðu allar rúður á efri hæð skólans að austanverðu.
Árið 2001 voru Gagnfræðaskólinn og Varmárskóli sameinaðir undir nafninu Varmárskóli eldri og yngri deild. Skólinn var einsettur samkvæmt lögum 2001.

 

Húsnæði skólans
Bæði skólahúsin voru byggð í áföngum. Varmárskóli yngri deild var byggður í þremur áföngum, síðasti áfanginn 1998, hátíðarsalurinn og fjórar kennslustofur á neðri hæð þeirrar álmu einnig var bætt við átta kennslustofum í suður og norður álmum hússins.

Hönnun 1. áfanga , vesturálman, var unnin árið 1960 hjá Húsameistara ríkisins af Guðmundi Guðjónssyni arkitekt.
Hönnun 2. áfanga, austur-og suðurálma ásamt tengibyggingu, var unnin af Þorvaldi Kristmundssyni arkitekt og Magnúsi Guðmundssyni árið 1979.

Um 1970 var hafist handa við að byggja Gagnfræðaskóla Mosfellsbæjar, núna eldri deildina.Birgir Breiðdal var arkitekt skólans. Hófst kennsla þar 1973.

Hönnun 3. áfanga yngri deildar, viðbyggingar við vestur- og austurálmu ásamt stækkun tengibyggingar og norðurálma, var unnin af Vilhjálmi Hjálmarssyni arkitekt árið 1997.

Brúarland - útibú
Brúarland er sögufrægt hús í Mosfellsbæ og þar hefur verið starfræktur skóli í áratugi. Eftir gagngerar endurbætur hófst skólastarf að nýju í Brúarlandi haustið 2016 og þá sem útibú frá Varmárskóla. Þórdís Eik Friðþjófsdóttir var ráðinn deildarstjóri, en reksturinn var á ábyrgð skólastjóra Varmárskóla.

Fyrsta árið voru 23 nemendur 1. og 2. bekk. Haustið 2018 byrjuðu 94 nemendur í 1.- 5. bekk. 

Starfsemin í Brúarlandi byggði á skólastefnu- námskrá og skóladagatali Varmárskóla. Samvinna var því mikil milli bekkjardeilda í útibúinu og skólans. Boðið var upp á heildstæðan skóladag, stoðþjónustu, mötuneyti og frístund.

Útibúið í Brúarlandi var fyrsta skrefið í stofnun á nýjum skóla í Helgafellslandi, en skólastarf hófst þar í janúar 2019. Haustið 2018 var Rósa Ingvarsdóttir ráðinn skólastjóri Helgafellsskóla og hófst þá formlegur undirbúningur að skólastarfinu í nýju húsnæði.

Skólastjórar Varmárskóla og Gagnfræðaskóla Mosfellsbæjar

Varmárskóli:
  • Lárus Halldórsson var skólastjóri Varmárskóla frá 1961 – 1966. 
  • Ólafur Ingvarsson var skólastjóri frá 1966 – 1970
  • Tómas Sturlaugsson frá 1970 – 1977
  • Pétur Bjarnason frá 1977 – 1983
  • Birgir D. Sveinsson 1983 – 1996 og 1997 – 2000
  • Þyri Huld Sigurðardóttir frá 1996 – 1997 og haustið 2000.
  • Viktor A. Guðlaugsson var skólastjóri sameinaðs grunnskóla eldri og yngri deildar frá 2001 – 2007.
  • Þórhildur Elfarsdóttir tók við sem skólastjóri í eldri deild skólans og Þóranna Rósa Ólafsdóttir sem skólastjóri í yngri deild árið 2007.

Brúarlandsskóli/Gagnfræðaskólinn
  • Gylfi Pálsson var skólastjóri Brúarlandsskóla og svo Gagnfræðiskólans frá 1966 – 1986 og 1987 - 1991.
  • Einar Georg Einarsson , var skólastjóri 1986 – 1987
  • Ragnheiður Rikharðsdóttir frá 1991 – 2000 en þá var Gagnfræðaskólinn og Varmárskóli sameinaðir undir nafninu Varmárskóli eldri og yngri deild.

Þessi síða notar vafrakökur Lesa meira