Vikufréttir Varmárskóla 23.febrúar 2024

Fyrstu dagarnir eftir frí eru oft svolítið erfiðir hjá nemendum. Þá er eins og svefntími og rútína hafi ruglast og því höfum við fundið svolítið fyrir þessa viku. Það var því mjög viðeigandi að þema þessarar viku var að vinna með hugtakið ,,seiglu”. Allskonar verkefni hafa verið unnin, fundin samheiti og orðið og þýðing þess fyrir einstaklinga að geta sýnt seiglu þegar eitthvað bjátar á útskýrð bæði í orði og verki eins og sjá má á meðfylgjandi mynd. Það er mjög mikilvægt að foreldrar hafi þetta líka í huga í daglegu uppeldi barna. Á þessari slóð hér eru mjög gagnlegar upplýsingar fyrir foreldra um seiglu. Ég hvet foreldra til að skoða þetta og velta fyrir sér hvort þeir eru ekki örugglega að byggja upp seiglu hjá börnunum sínum. https://sterkariutilifid.is/fjolskyldan/seigla/

Nú þá er rétt að geta þess að talsverður tími hjá starfsmönnum hefur farið í að leysa úr málum sem eiga rætur að rekja til leiðinlegra skeytasendinga á samfélagsmiðlum. Við viljum því  ítreka við ykkur að skoða síma barnanna ykkar reglulega, helst á hverjum degi. Þið þurfið að vita við hverja þau eru í samskiptum og um hvað þau samskipti snúast. Líka hvort orðræðan sem þar er beitt er viðeigandi eða kannski særandi og mjög ljót. Það er mjög mikilvægt að foreldrar tali saman um þetta og hafi samband sín á milli ef hlutir eru ekki í lagi í netheimum rétt eins og annars staðar.

Sem glaðing í lokin langar okkur að  sýna ykkur mynd úr heimilisfræði frá því í morgun þar sem markmiðið var að ná leikni í að flysja kartöflur og nýta afganga í nýja máltíð. Einn nemandi hafði á orði að þetta væri svo góður matur að hann biði spenntur eftir að elda svona heima og gefa pabba sínum að smakka.

Hafið það gott um helgina

Keðja

Starfsfólkið í Varmárskóla