Vikufréttir Varmárskóla

Menningarstarfssemi er sinnt af miklum móð í skólanum þessa dagana, í vikunni fengu bæði 1. og 2.bekkur upplestur frá rithöfundi. Að þessu sinni var það Eva Rún Þorgeirsdóttir sem kom og las fyrir krakkana.

Kennarar eru duglegir að að nýta garðinn við Hlégarð sem er svo fallega skreyttur um þessar mundir og dásamlegt að fara þangað til að stunda hugleiðslu og öðlast sálarró eða bara til að dást að þessu fallega umhverfi. Það gerðu nemendur úr 1.bekk einmitt í vikunni.

5.bekkur er búinn að velja bækur til innkaupa fyrir söfnunarféð frá jólabingóinu og þær eru komnar í pöntun hjá okkur. Takk aftur Foreldrafélag Varmárskóla.

Nemendur eru ótrúlega flinkir að búa til jólaskraut og skólinn er allur að verða fallega skreyttur. Þegar verið er að búa til jólaskraut er ekki bara verið að skreyta, það er verið að æfa fínhreyfingar og mjög oft er heilmikil stærðfræðileg vinna í skreytingunum. Nú svo má ekki gleyma samvinnunni, sem er eins og aldrei verður of oft sagt, eitt af því mikilvægasta sem við kennum krökkum. Flestar föndurstundir fela í sér mikla samvinnu og hjálpsemi milli nemenda. Margar þeirra fela einnig í sér að nemendur hugsi um hverja þeir vilja helst gleðja í lífi sínu og hafa þar með áhrif á hvernig nemendur hugsa um tengslanet sitt þó að þeir átti sig kannski ekki á því á þeirri stundu.

Árgangar eru nú að senda út föstudagspósta með upplýsingum um dagskrá þessara síðustu daga fyrir jólafrí. Litlu jólin verða í skólanum þann 20.desember eins og skóladagatal gerir ráð fyrir. Þann dag hefst skóli kl.9:00 og lýkur kl.12:00 og nemendur og kennarar skipuleggja saman eitthvað til skemmtunar. Ekki er framreiddur matur þennan dag svo þeir sem fara í frístund að skóladegi loknum þurfa að koma með nesti. Nánari upplýsingar um þetta eru í póstum frá kennurum árganga.