logo
  • Virðing -
  • Jákvæðni -
  • Framsækni -
  • Umhyggja

Vikufréttir Varmárskóla

18.11.2022

Vikan sem er að líða hefur verið afskaplega venjuleg hjá okkur, sem er í sjálfu sér óvenjulegt. Það er búið að vera svo mikið um að vera hjá okkur að undaförnu að við ákváðum að vera bara lágstemmd á Degi íslenskar tungu. Flestir hópar unnu þó einhver verkefni í tilefni dagsins. Í 6.bekk var til dæmis unnið með ljóð eftir Bubba sem nemendur myndskreyttu og ef vel er að gáð geta lesendur áttað sig á hvaða ljóð þetta var.

Foreldrafélagið færði öllum börnum skólans endurskinsmerki með merki Varmárskóla og færum við því bestu þakkir fyrir. Laserskerinn okkar er kominn í hús og nú er verið að huga að tengingum og vonandi getum við tekið hann í notkun sem allra fyrst. Hluti starfsmanna mun svo fara í heimsókn til Mixtúru hjá Reykjavíkurborg í næstu viku tl að skoða hver verða næstu skref hjá okkur í aukinni tæknivæðingu og nýsköpun í kennslunni.

Í næstu viku verður sú nýbreytni hjá okkur að 5. og 6. bekkur prófa að vera í valgreinum í  verkgreinatímum. Settar voru upp nýjar verkgreinar sem nemendur völdu sig inn í. Við erum spennt að prófa þetta sem eykur enn á fjölbreytni þeirra viðfangsefna sem nemendum bjóðast í skólanum.

Að lokum vil ég minna á fræðslufundinn sem skólinn og foreldrafélagið standa að á mánudaginn 21.nóv. frá 19:30 – 20:30. Þar verður fjallað um stafrænt uppeldi og þær áskoranir sem foreldrar standa frammi fyrir vegna netheima. Það er ekki að ástæðulausu sem þetta viðfangsefni varð fyrir valinu. Við erum ítrekað að fá upplýsingar um hegðun barna á netinu sem er langt frá því að vera uppbyggileg og í mörgum tilvikum beinlínis skaðleg. Þetta á við um bæði samfélagsmiðla og tölvuleiki. Við sleppum ekki börnunum okkar án leiðbeininga út í hinn raunverulega heim og ættum enn síður að sleppa þeim lausum út í netheima þar sem eftirlit foreldra er mjög takmarkað. Ég hvet alla foreldra til að taka þennan tíma frá og vera með okkur þennan klukkutíma.

Til baka

Myndir með frétt

Þessi síða notar vafrakökur Lesa meira