Vikufréttir Varmárskóla

Það hefur verið mjög mikið um að vera hjá nemendum Varmárskóla þessa vikuna. Allskonar verkefni eru í gangi í öllum árgöngum og sum þeirra hafa ratað á Facebooksíðuna okkar. Stærsta verkefnið þessa vikuna var þó lokahátíð Litlu upplestrarkeppninnar sem haldin var á sal skólans á fimmtudagsmorgun.  Markmið þessarar keppni er að gera betur í dag en í gær og það hefur verið dásamlegt að fylgjast með framförum nemenda við upplesturinn og í að fara eftir fyrirmælum. Það er talsvert fólkið mál að muna hvenær maður á að stíga fram og að fara aftur á sinn stað að lestri loknum og ég tala nú ekki um að reyna að láta heyrast sem allra minnst í sér á meðan aðrir eru að lesa. Að lestrinum loknum stóðu svo foreldrar fyrir veislu þar sem nemendur og gestir gæddu sér á veitingum af hlaðborði. Hér er hlekkur á myndband af lokaatriði hátíðarinnar en í því lásu allir nemendur saman í kór. https://www.youtube.com/watch?v=25nPLEoVFBE

Nú svo hélt 3.bekkur vöffluhátíð í dag og 1.bekkur fór allur saman í göngutúr sem endaði með dansveislu úti í garði að hætti Írisar.

Við þetta má svo bæta því að hér komu dásamlegir fulltrúar foreldrafélagsins og flokkuðu alla óskilamunina svo nú er auðvelt að finna það sem mann vantar. Við hvetjum ykkur til að koma og reyna að finna það sem ykkur vantar af fötum barnanna ykkar. Það sem eftir verður fer í Rauða krossinn þegar skólinn lokar í vor.