Fréttir

Nemendur í 10. bekk Varmárskóla héldu dagana 29.-31. maí í útskrifarferð ásamt umsjónarkennurum sínum. Ferðinni var heitið í Skagafjörð þar sem gist var í Varmahlíðarskóla. 

Fyrsta daginn var farið í Wipeoutbrautina á Bakkaflöt þar sem krakkarnir fóru í gegnum sérstaka þrautabraut. Fæstir komust þurrir frá þrautabrautinni og því var næst haldið í sund í Varmahlíð. Eftir kvöldmat var síðan haldið í klettaklifur og sig með aðstoð björgunarsveitarinnar á staðnum og í skotfimi hjá Skotfélaginu Ósmanni á Sauðárkróki þar sem nemendur fengu að spreyta sig á æfingabraut félagsins. 

Daginn eftir var haldið í flúðasiglingu niður Jökulsá vestari við mikla ánægju nemenda og stór hópur nemenda og huguðustu kennararnir stukku út í ána fram af kletti. Einnig var farið í litbolta á litboltasvæðinu við Bakkaflöt. Það voru þreyttir en ánægðir nemendur sem héldu heim á leið á föstudaginn eftir frábæra ferð í Skagafjörðinn.

Fleiri myndir á myndasíðunni: 10.b-Útskriftarferð

10. bekkur er búinn að vera í skólaferðalagi. Von er á hópnum upp í skóla í dag um kl. 14:15/14:30

Börnin í 2. bekk fóru í heimsókn í Alþingishúsið miðvikudaginn 29. maí. Þau fengu leiðsögn um húsið og þótti þeim það mjög áhugavert. Börnin borðuðu nestið á Austurvelli og fóru í göngutúr um miðbæinn. Þau skoðuðu fuglana á tjörninni og skoðuðu líkan af Íslandi í Ráðhúsi Reykjavíkur.

Fleiri myndir á myndasíðu: 2b. Alþingi

Bestu kveðjur
2. bekkur

Í morgun veitti frú Vigdís Finnbogadóttir fyrrverandi forseti fjórum stúlkum úr Mosfellsbæ Laxnessfjöðrina sem er viðurkenning sem Samtök móðurmálskennara veita fyrir ritlist. Þær Margrét Dís Stefánsdóttir og Kristjana Björnsdóttir úr Varmárskóla og Andrea Dagbjört Pálsdóttir og Diljá Guðmundsdóttir úr Lágafellsskóla hlutu viðurkenninguna í ár fyrir verk sem þær sömdu í tengslum við ritunarátak innan skólanna.

Myndirnar tók Jóhannes Reykdal en þær eru á myndasíðunni. Einnig birtist frétt um þetta á mbl.is

 Fyrsti bekkur IE hélt bekkjarkvöld að Hraðastöðum í Mosfellsdal. Það var mjög skemmtileg, gott veður og góð mæting. Grillaðar voru pylsur.  Á Hraðastöðum eru kindur, hestar, kanínur, hundar og hænur. Fleiri myndir á myndasíðu

Fimmtudagsmorgun 23. maí komu væntanlegir nemendur í 1. bekk Varmárskóla í heimsókn ásamt foreldrum sínum. Allir mættu fyrst á sal þar sem Þóranna skólastjóri tók á móti þeim og ræddi við börn og foreldra um skólabyrjun. Eftir það var nemendum boðið með kennurum í stofur í spjall og verkefnavinnu meðan foreldrar sátu eftir í sal. Þar kynnti Guðrún Bjarkadóttir skólahjúkrunarfræðingur hlutverk sitt í skólanum og Solveig Ólöf Magnúsdóttir deildarstjóri fór yfir mikilvægi lestrarnáms. Nemendur fengu poka heim með lítilli verkefnabók og ýmsum upplýsingum um nýja skólann sinn.

Myndir á myndasíðu

Eins og kunnugt er stendur Mosfellsbær á tímamótum varðandi gerð nýrra skólabygginga fyrir leik- og grunnskóla. Af því tilefni býður Skólaskrifstofa Mosfellsbæjar íbúum bæjarins og þeim sem nær standa skólasamfélaginu til samráðs um skóla og skólabyggingar í nútíð og framtíð.

Nú er komið að því að nemendur sem verða í 8., 9. og 10. bekk næsta skólaár þurfi að velja. Mikilvægt er að foreldrar/forráðamenn aðstoði nemendur með valið og það sé vel ígrundað.

Valbók og valblöðin má nálgast hér.

Skólakór Varmárskóla var með vortónleika sína þriðjudagskvöldið 14.maí. Eins og sjá má á myndinni er kórinn skipaður mörgum félögum. Kórinn er með þrjár skiptingar, unglinga, miðstig og yngsta stig. Á tónleikunum sungu kórarnir ýmist saman eða í sitthvoru lagi. Guðmundur Ómar kórstjóri á hrós skilið fyrir stjórn kórsins og kórfélagar fyrir þátttöku og útkomu í glæsilegum kór.

Skólakór Varmárskóla heldur vortónleika í sal Varmárskóla þriðjudaginn 14.maí klukkan 18:00.

Um 70-80 börn og unglingar hafa tekið þátt í kórstarfinu í vetur sem hefur verið mjög blómlegt. Meðal annars tók kórinn þátt í landsmóti íslenskra barnakóra sem fram fór í Kópavogi í apríl.

Á liðnum árum hefur kórinn víða komið fram bæði innanlands og utan, m.a. farið í söngferðir til Noregs, Frakklands, Danmerkur og Spánar.

Efnisskrá tónleikanna er fjölbreytt og lífleg að vanda. Hvetjum alla sem unna góðri tónlist að mæta og sjá hvað krakkarnir eru flottir í skólakór Varmárskóla.

Söngstjóri er Guðmundur Ómar Óskarsson.