Vikufréttir Varmárskóla

Varmárskóli átti 13 fulltrúa á barnaþinginu sem haldið var í Hlégarði í gær. Þingið er liður í innleiðingu Barnvæns samfélags í Mosó og þar gafst nemendum tækifæri til að segja sínar skoðanir á því hvað mætti betur fara í Mosfellsbæ. Við vorum ákaflega stolt af okkar krökkum og vitum að þeir kunna að taka þátt í málefnalegri umræðu.

En þó að krakkarnir okkar kunni vel að taka þátt í málefnalegri umræðu láta þeir samt stundum teyma sig í ógöngur í því efni. Okkur varð ljóst í vikunni að nokkur hópur úr 6.bekk hefur verið í nafnlausum samskiptum á tik-tok og það voru engan veginn uppbyggileg eða málefnaleg samskipti. Þá kom einnig í ljós í verkefnavinnu hjá 5.bekk í dag, þegar kennarinn bað nemendur að skrifa á miða ljóta hluti sem höfðu verið sagðir við þá á netinu, að þar var orðbragðið síst skárra. Það var raunar þannig að ekki er hægt að hafa það eftir í fréttum eins og þessum, en algengt var að börnum í 5.bekk hefði verið sagt að drepa sig eða hverfa af yfirborði jarðar með einhverjum hætti. Það er ástæða fyrir aldurstakmörkunum á samfélagsmiðlum og hún er meðal annars sú að börn og unglingar gera mjög oft hluti í hvatvísi og í samskiptum þar sem ekki þarf að horfast í augu við neinn verður það enn meira freistandi. Einnig er ekki hægt að vita nákvæmlega við hverja þau eru í samskiptum á netinu eða tryggja fyllilega öryggi þeirra. Þau eru eðlilega ekki fær um að bera fyllilega ábyrgð á orðum sínum eða gjörðum þar frekar en annars staðar.

Við hvetjum foreldra til að fylgjast vel með netsamskiptum barna sinna. Það er nákvæmlega ekkert að því að skoða símana þeirra með þeim og minnum líka á að þó að aldurstakmark leyfi manni eitthvað eiga foreldrar alltaf að hafa síðasta orðið.

Kveðja og hafið það gott í góða veðrinu

Starfsfólkið í Varmárskóla