Vikufréttir Varmárskóla

Dásamleg vika að baki., dagurinn í dag var meðal annars nýttur í margskonar útiveru í góða veðrinu, umhverfi Varmárskóla býður upp á fjölmörg tækifæri til náttúruupplifunar og kennarar eru útsjónarsamir við að flétta slíkt inn í kennsluna sína.

Nemendur í 5. og 6.bekk gátu valið sér verkefni í verkgreinum þessa vikuna. Það er ekki bara vegna handverksins heldur líka til að efla sjálfstæði, æfa sig í að standa með sjálfum sér og við það sem maður hefur valið. Það er svo gaman að sjá hvernig nemendur sökkva sér ofan í viðfangsefni og þar skiptir áhuginn miklu máli. Eins og sjá má á meðfylgjandi myndum voru fjölbreytt verkefni í boði og við vonumst til að geta gert enn betur í þessu á næsta ári. Fyrir páskafrí munu nemendur núverandi 4. og 5. bekkjar verða beðnir um að koma með tillögur að því sem þá langar til að hafa í valvikum næsta árs.

Þriðji bekkur bauð svo foreldrum í heimsókn til að skoða afrakstur af geimþema sem hefur verið í gangi þar síðustu vikur. Það var frábær mæting og ég er viss um að margir foreldrar fengu nýja fróðleiksmola hjá börnum sínum sem fræddu gesti um plánetur og fleira.