logo
  • Virðing -
  • Jákvæðni -
  • Framsækni -
  • Umhyggja

Vikufréttir Varmárskóla

04.11.2022

Eins og á flestum stöðum þar sem börn eru í meirihluta var mjög mikill spenningur í húsi hjá okkur á mánudag. Langflestir nemenda mættu í búningum og starfsmenn höfðu mikið fyrir að skreyta skólann.

Á miðvikudaginn í síðustu viku var skipulagsdagur hjá okkur, hann var nýttur til að samræma námsmat í skólanum og taka ákvörðun um hvernig lokamat í námsgreinum fer fram. Mörgum flötum á því máli var velt upp, meðal annars því hvort það væri yfirleitt viðeigandi og til gagns fyrir nemendur að leggja mikla áherslu á lokamat á vinnu þeirra. Þetta eru jú börn sem þroskast á mismunandi tímum og námsmat má ekki verða eins og einhver dómur yfir þeim um getu eða leiða til samanburðar milli barna, því þá værum við sannarlega að bera saman epli og appelsínur, svo ólík sem börnin okkar öll eru. Við tengjum allar kennsluáætlanir hæfniviðmiðum úr aðalnámsskrá grunnskóla og foreldrar geta fylgst með mati um leið og það kemur inn. En það sem mikilvægast er að kenna og læra hefur engin skilgreind hæfniviðmið í aðalnámskrá sem hægt er að nota til að meta. Það er samskiptafærnin, félagslega vitundin og gagnrýna hugsunin. Það er því ekki einfalt verkefni að ákvarða hvernig mat á námi barna skal háttað. En okkar niðurstaða er að nota frekar tákn (sem hafa verið sett upp í mentor) en bókstafi í lokamati. Við teljum táknin segja meira um á hvaða leið barnið því þetta er jú ferðalag en ekki lokapunktur.

Í gær var svo námskeiði fyrir vinaliðana okkar sem standa sig mjög vel í að vera með skipulagða leiki í frímínútum.

Foreldrafélagið stóð einnig fyrir námskeiði fyrir foreldra í gærkvöldi sem var vel sótt. Þar fengu foreldrar upplýsingar sem gagnast vel til að móta og skipuleggja samstarf foreldra í bekkjum og árgöngum.

Á þriðjudag í næstu viku verðum við svo með nemendaþing þar sem nemendur ræða forvarnir gegn einelti. Unglingar úr F-Mos munu hjálpa okkur á þinginu. Við hlökkum til að segja ykkur frá þessu í næsta vikupistli.

Hafið það gott um helgina

Starfsfólkið í Varmárskóla

Til baka

Myndir með frétt

Þessi síða notar vafrakökur Lesa meira