Vikufréttir Varmárskóla

Við vorum svo heppin að fá nemendatónleika frá Listaskóla Mosfellsbæjar í morgun og VÁ hvað það var gaman. Tónleikarnir voru þrískiptir og allt að 150 nemendur á hverjum þeirra. Hljóðfæraleikararnir voru úr öllum skólum Mosfellsbæjar og stóðu sig mjög vel í að spila fyrir þennan fjölda. Áheyrendur voru líka frábærir, það er ekki auðvelt fyrir alla að sitja og hlusta á lifandi tónlist og klappa bara við lok laganna, en þetta gekk mjög vel og við vorum ákaflega stolt af okkar fólki, bæði spilurum og hlustendum. Nokkrar myndir af tónleikagestunum fylgja með þessari frétt.

Foreldrar nemenda í 4. og 6. bekk hafa fengið sendan póst vegna könnunarinnar Heilsa og lífskjör skólabarna sem til stendur að nemendur taki í lok mars eða byrjun apríl. Við biðjum þá sem ætla að hafna þátttöku að gera það fyrir 25. mars.

Verið er að taka í notkun nýtt skráningarkerfi vegna mötuneytis og vonandi eru allir búnir að bregðast við þeim póstum og skrá börn sín í nýja kerfið.

Og að lokum vil ég nefna að við erum hreinlega að drukkna í óskilamunum. Fulltrúar frá foreldrafélaginu komu í vikunni og flokkuðu eftir því sem hægt er en við biðjum foreldra endilega að koma við í skólanum og athuga hvort eitthvað tilheyri þeirra barni.

Hafið það gott um helgina

Starfsfólkið í Varmárskóla