Vikufréttir Varmárskóla

Það sem hæst bar í þessari viku var auðvitað öskudagsskemmtunin. Það var magnað að upplifa spenninginn og gleðina sem ríkti í húsinu þann dag. En það er líka vert að hafa í huga að með öllu sem við gerum eru líka einhver námsmarkmið, hvort sem þau tengjast því sem við köllum venjulega nám, félagsþroska nemenda eða uppbyggingu skólasamfélags. Þegar nemendahópar voru að ,,slá köttinn úr tunnunni” í íþróttahúsinu reyndi mikið á samvinnu, hvatningu og samkennd. Það er gríðarlega erfitt að standa í röð og bíða eftir að komi að manni þegar um svona spennandi verkefni er ræða, það var einfaldlega aðdáunarvert hvað það gekk vel hjá 99% nemenda. Það langar auðvitað líka alla að vera sá sem nær síðasta högginu en það yrði ekkert síðasta högg án allra þeirra sem eru búnir að slá á undan.

Gleðin og orkan í dansinum sem var skipulagður á móti dagskránni í íþróttahúsinu var mögnuð, á hlekkjunum hér að neðan má sjá smá þátttökugleðina sem var einkennandi fyrir þennan morgun. Það eru ekki allir grunnskólar svo heppnir að geta boðið nemendum sínum upp á danskennslu.

https://youtu.be/Yf0WAjuCPuk

https://youtu.be/UpiXdOAjw0g

Foreldrakönnun Skólapúlsins er nú lokið. Við höfum fengið upplýsingar um að hjá okkur hafi náðst nægt svarhlutfall til að hægt sé að vinna úr könnuninni og við þökkum öllum sem gáfu sér tíma til að svara. Í næstu viku getum við vonandi birt einhverjar niðurstöður.

Í dag hófst innritun í grunnskóla Mosfellsbæjar fyrir næsta skólaár, innritun fer fram á https://www.mos.is/forsida/frettir/frett/2022/03/04/Innritun-i-grunnskola-Mosfellsbaejar-fyrir-skolaarid-2022-2023/

Aðeins þarf að innrita þá nemendur sem koma nýir í skólann.

Hafið það gott um helgina

Starfsfólk Varmárskóla