logo
  • Virðing -
  • Jákvæðni -
  • Framsækni -
  • Umhyggja

Vikufréttir Varmárskóla

12.11.2021

Þessi vika hefur verið alveg dásamleg í skólanum. Allir bekkir hafa verið að vinna markvisst með uppbyggileg og góð samskipti. Verkefnin hafa verið margvísleg og fjallað hefur verið til dæmis um stafræna borgarvitund, hugrekki, vináttu, einelti og ofbeldi. Hvar sem litið hefur verið inn í skólastofur hafa viðfangsefnin tengst samskiptum á einhvern hátt. Nokkrar færslur hafa verið birtar á facebooksíðu skólans um þetta í vikunni. Myndin sem fylgir þessari frétt er af seesaw verkefni nemenda í 3.bekk sem voru að flokka orð eftir því hvort þau lýsa góðri vináttu eða ekki.

Nú þá er búinn vera góður gangur í breytingum á sorpmálum hjá okkur. Umhverfisnefnd nemenda og starfsmanna hefur fundað og búið til nýtt verklag við flokkun og fengið nýja gáma undir flokkunarsorpið. Okkur langar til að verða framúrskarandi á þessu sviði, enda er það framtíðin.

Þá eru það sóttvarninar og veikindi af Covid-19. Það hefur verið talsvert um smit hjá okkur síðustu tvær vikur. Þegar upp kemur smit sem tengist skólanum hefur rakningateymi Almannavarna samband við okkur og gefur okkur nákvæm fyrirmæli um hvað skuli gera. Reglur þeirra um sóttkví og smitgát eru nokkuð skýrar og við hjálpumst að við að finna hverjir falla undir þær. Haft er samband símleiðis við þá sem eiga að fara í sóttkví en þeir sem eiga að skrá börn sín í smitgát fá tölvupóst frá skólanum. Til viðbótar við þetta látum við núna allan árganginn vita ef upp kemur smit svo fólk geti tekið eigin ákvarðanir um sjálfskipaða sóttkví ef þurfa þykir vegna aðstæðna.

Nokkuð hefur verið um það að börn sem hafa veikst, kvíða því að koma í skólann aftur, þar sem þau hafa áhyggjur af því að þeim verði strítt eða að enginn vilji vera með þeim af því að þau voru með Covid. Við biðjum ykkur að ræða þetta við börnin ykkar því það er auðvitað engum að kenna ef einhver veikist og mikilvægt að taka vel á móti nemendum þegar þeir koma til baka.

Nýjustu vendingar í sóttvörnum voru að birtast í fjölmiðlum, við fyrstu sýn virðast þær ekki hafa mikil áhrif hér hjá okkur nema ef við þurfum að skipta nemendum meira upp í matsalnum, það kemur í ljós þegar líða fer á helgina og ef einhverjar nýjar upplýsingar koma munu þær verða birtar hér og foreldrar fá tölvupóst.

Hafið það gott um helgina!

Kveðja,
Starfsfólkið í Varmárskóla

Til baka

Þessi síða notar vafrakökur Lesa meira