Vikufréttir Varmárskóla

Við höfum lagt áherslu á að hafa skólastarfið sem mest í hefðbundnum skorðum þessa viku og gæta þess að nemendur fari eins lítið milli hópa og hægt er. Það hefur verið talsvert um smit hjá okkur, bæði hjá nemendum og starfsfólki og því fyllsta ástæða til að gæta varúðar. Þegar upp koma smit, sem rakningateymi almannavarna telur að tengist skólanum, er hringt í okkur og við fáum leiðbeiningar um hvað skuli gera, hverja eigi að skrá í sóttkví og hverja í smitgát og við förum nákvæmlega eftir þessum fyrirmælum. Upplýsingar um hvað sóttkví og smitgát fela í sér má finna á vefnum covid.is. Það er mikilvægt að allir taki þessu alvarlega svo við eigum möguleika á að ná smitunum niður í kringum okkur.

Þetta hefur líka leitt til þess að við þurfum að breyta áætlun næstu viku nokkuð. Á dagskrá er að leggja áherslu á vinnu með samskipti í öllum árgöngum í næstu viku í tilefni af alþjóðlegum baráttudegi gegn einelti.  Upphaflega hugmyndin var að blanda nemendum á umræðuþingum og svo í leikjum við lok vikunnar. Það teljum við ófært að gera núna í ljósi stöðunnar á smitum í umhverfinu.  Árgangarnir munu því vinna hver fyrir sig í næstu viku en allir fjalla um góð samskipti með einum eða öðrum hætti.

Hafið það gott um helgina.

Kveðja,
Starfsfólk Varmárskóla