Leiklist í list- og verkgreinum hjá 5. og 6. bekk

Í leiklistinni er lagt mikið uppúr samvinnu og er sérstök áhersla lögð á að kynnast vel öllum þeim sem eru í hópnum og því mikilvægt að allir hafi unnið saman á einhverjum tímapunkti kennslunnar.

Í leiklist er mikilvægt að þekkja sjálfan sig, og í vetur hefur verið unnið í að skoða tilfinningalæsi og túlkun. Nemendur vinna einnig saman í því að skrifa leikrit, en þar fá nemendur tækifæri til að nota ímyndunaraflið til hins ýtrasta og fram hafa komið persónur allt frá grilluðum ananas til Lionel Messi fótboltastjörnu.

Rúsínan í pylsuendanum er svo þegar nemendur fá að skapa sinn eigin trúð, þá með göngulagi, rödd, kækjum og svo að lokum með trúðanefi sem nemendur fá til eigu.

Meðfylgjandi er slökunaræfing sem hentar jafnt börnum sem og fullorðnum. 
Kjörin æfing til að prófa saman og einnig kjörin æfing fyrir foreldra til að nýta í pásu í vinnunni eða jafnvel bara úti í bíl eftir langan vinnudag.